尖東海傍迎接2008

今年有激光匯演倒數,我地拉屎家族拉大隊去迎接2008.食完飯開始由廣東道行過去文化中心,未到10點半廣東道已經封o左路,海運已經唔比過,唯有企o左係度....好在後來警察都逐步放o左兩三批人入去天星碼頭,(當然包括我地!!)如果唔係都好無奈.....我諗晏多少少去都已經要屈起海運後巷倒數

天氣雖然好凍,但咁多人迫埋一齊,氣都抖唔到啦,何來冷空氣.大約11點45分到啦,匯演開始,港島大廈由左至右順著閃燈和放煙花.

最靚都係國金,煙花好似科斗仔咁圍住大廈,由下至上發放.好得意.最可惜我地企o既位置唔可以睇晒全景...就連幾時開始倒數都唔知.

好多年都無迫去倒數啦,熱鬧下,好開心

跟住散場就金啦,沿廣東道行到落油麻地....先搭到車

差唔多用o左1個鐘先可以join到我o既好朋友仔繼續狂歡

願新一年各方好友都開開心心,樣樣都順利